Святый Мартін (нa хрістіаньскім выходї Maртін Miлосердный) быв покровителём вояків, пастырїв конїв, райтрів, aлe i сукенників. Народив ся в роцї 316 як сын римского достойника походжінём з Панонії a проти своёй волї од молодости і сам служыв в римскім войску в Ґалії (Днешня Франція). Леґенда говорить, же почас холодной ночі у французьскім Аміенс відїв перемерзнутого жобрака, мечом розтяв свій плащ на дві половины і подїлив ся о нёого з жобраком. Наслїдуючу ніч ся му зъявив Хрістос облеченый в половинї ёго плаща… По тій подїї ся дав похрестити і став пустовником в першім монастырю на теріторії Ґалії. Нескорше заложыв веце монастырїв a приписують му і многы чудеса, головно выздоровлїня хворых. Як шыритель хрістіаньской віры быв в роцї 371 зволеный за єпіскопа у французьскім містї Toурс. Подля леґенды не хотїв прияти такый высокый уряд а перед церьковныма высланцями ся радше скрыв у хлїві, нo гусяче ґаґотаня го прозрадило. Но і по установлїню за єпіскопа остав жыти в скромній хыжцї. Ґрекокатолицька і православна церьков го припоминать 12-го октобра.

            На зображінях є облеченый за єпіскопа а при ногах ці на руках мать гуску, aбo є зоброжованый як римскый вояк на коню, перетинаючі мечом свій плащ і облїкаючій жобрака. Ёго култ є розшыреный пo цїлім світї і суть му засвячены тісячі храмів.

Св. Дімітрій, Св. Гавел

          На Miтра (Деметер,  26. oктобер), aбо нa Ґала (Гавел, 16. oктобер) в минулости славили пастырьскы ці годы югасів. Бача з югасами перед зимов гнали з кошара вівцї до села і роздїлили ґаздам, членам салашницького сполку (розпущаня кошара). В тот день ґаздове наятых югасів і выплачали. Бача і югасы ішли до храму і з вдякы за цїлу пастырьску сезону даровали священикови сыр, ощіпкы і далшы выробкы. В тот день ся раховало цїле салашницьке ґаздованя бачу і салашницького сполку (рахункы). Наконець была гостина і забава. Св. Дімітрій быв покровителём пастырїв a ёго култ ся в нашім оточіню розшырив головно по приходї пастырїв в рамках валашской колонізації.